Стратегијата, како што оцени премиерот, претставува еден од најважните стратешки документи за државата, бидејќи е создадена преку процес во кој биле вклучени експерти, институции, локалната самоуправа, бизнис-заедницата и граѓанскиот сектор.
„Со години бевме принудени да размислуваме краткорочно и да решаваме проблеми од ден за ден. Денес имаме обврска да покажеме дека државата може да биде предвидлива, дека институциите можат да работат според план и дека развојот не смее да зависи од политичките циклуси“, изјави Мицкоски.
Oцени дека Националниот совет за развој е важен механизам за усогласување на различни политики и креирање мерки што ќе имаат долгорочен ефект врз општеството.
Во процесот на подготовка и реализација на стратегијата, како што посочи премиерот, учествувале повеќе од 1.200 претставници од различни области, а дел од планираните активности веќе се спроведуваат.
Мицкоски нагласи дека резултатите нема да се оценуваат според бројот на донесени документи, туку според конкретните промени што ќе ги почувствуваат граѓаните – подобри услови за работа, повисоки приходи, поквалитетно образование, подобро здравство и поефикасни институции.
Посебен акцент стави на инвестициите, иновациите, дигитализацијата и развојот на човечкиот потенцијал, оценувајќи дека тие ќе бидат клучни за конкурентноста на државата во следните две децении.
Премиерот се осврна и на демографските предизвици, посочувајќи дека задржувањето на младите во земјата е еден од најважните приоритети.
„Нашата цел е да создадеме услови младите да останат тука, да создаваат семејства и да веруваат дека нивните деца ќе имаат подобра иднина. Демографијата не е само статистика, туку прашање на национална одржливост“, рече Мицкоски.
Додаде дека спроведувањето на Националната развојна стратегија ќе бара континуитет, политичка зрелост и посветеност кон реформите.
„Целта е во 2044 година да можеме да кажеме дека сме изградиле посилна, побогата, поправедна и поуспешна Македонија – држава на можности која не ја чека иднината, туку ја создава“, порача премиерот.