Министерот за надворешни работи, Тимчо Муцунски, одговори на изјавите на лидерот на СДСМ, Венко Филипче, во врска со процесот на евроинтеграции, истакнувајќи дека преговорите со Европската Унија не можат да бидат блокирани, бидејќи, според него, тие „никогаш и не започнале, благодарение на СДСМ и ДУИ“.
„Од нас нема да слушнете големи зборови без покритие и празни чекори. Нашата задача не е да нудиме изговори, туку резултати. Затоа ја движиме државата напред – таму каде што ѝ припаѓа: во Европа. Тоа не е слоган, туку реалност што ја градиме преку конкретни проекти: бесплатен роаминг за нашите граѓани во ЕУ, зелени ленти за превозниците, пристап до европскиот единствен систем за плаќање, партнерство во безбедноста и одбраната со ЕУ. Тоа се вистински реформи, а не празни флоскули,“ истакна Муцунски.
Министерот потенцираше дека неговите напори се насочени кон обезбедување поевтин роаминг, но и кон зачувување на националниот идентитет, достоинство и гордост. „Не зборувам за виткање кичма, за администратори, за договори под маса, за прифаќање уцени или ултиматуми, како што тие го правеа тоа. Тука има разлика – и граѓаните ја гледаат таа разлика,“ додаде тој.
Муцунски упати повик до опозицијата да постапува рационално и да не го попречува европскиот пат на државата. „Ова не е борба за лични или партиски интереси. Ова е борба за граѓаните, за државата, за иднината. Ќе напредуваме само ако сите заедно ги ставиме државните пред партиските интереси,“ заклучи министерот.