Седница на Советот на Град Скопје за проблемот со јавниот превоз во главниот град засега не е закажана. Според извори од ЈСП, најава за прекин на работењето нема и нафта за автобусите е пристигната вчера во двете бази, која како што велат е доволна за вчерашниот и денешниот ден.

Граѓаните, утрово, повторно беа сведоци на хаос во превозот – на улиците можат да се забележат автобуси на приватните превозници, но бројот на оние на ЈСП се ретки.

Поранешниот заменик-градоначалник и независен член на Советот, Александар Трајановски, за МИА потврдува дека засега нема никаква најава за итна седница.

„Засега нема повикано седница, ниту од страна на град Скопје, ниту од советниците. Дополнителна осакатеност е тоа што Советот, по преминувањето на Трајко Славески, нема претседател и секоја седница индивидуално се назначува. Засега седница нема закажано, особено не за точката за која ме прашувате“, вели Трајановски.

Скопје пред колапс: „Пуцко петрол“ го блокира превозот, граѓаните во неизвесност