Дваесет и осум годишниот Тарик Семси, по потекло од Македонија, од турската етничка припадност, а живее во Италија, е кандидат за советник во општискиот совет на Венеција.
Тарик води потекло од селото Коџаџик – Центар Жупа во близина на Дебар. Тој е прв Македонец и воопшто странец кој се нашол на кандидатска листа за советници во овој познат италијански град.
Дипломирал архитектура на престижниот универзитет во Венеција, оженет е и е татко на едно дете.
Во трката на локалните избори, што ќе се одржат на 24 и 25 мај, тој е на независната листа на кандидатот за градоначалник, Симоне Вентурини, познат адвокат, поддржан од италијанската десница.
,,Тарик е прекрасно и вредно момче. Со неговата подготвеност верувам дека ќе придонесе многу за градот Венеција и секако за многубројната македонска заедница, за нашите драги пријатели и сограѓани по потекло од Македонија. Искрено веќе го гледам како советник во 36-члениот совет”, рече кусо за МИА, Вентурини.
Инаку, Тарик е син на бизнисменот во Италија, Мунир Шемси, познат филантроп, кој со донации помага како во Италија, уште повеќе во матичната земја Македонија.
,,Горд сум на мојот син и верувам во успех на изборите, со поддршка и на сите Македонци кои живеат во оваа општина. Убеден см дека ќе испишеме историја, бидејќи ова е првпат во историјата да влезе странец во Советот на градот Венеција”, вели за МИА, неговиот татко Мунир.
Нашинците кои живеат во Венеција едвај чекаат да дојде денот на гласањето затоа што сметаат дека Tарик заслужува да влезе во Советот и ќе биде одличен пример за идните генерации.