Исто како да си на море, но за жал сме покрај бетон. Летната атмосфера на скопските улици е жива, но портфелот на граѓаните се чини дека сè повеќе ја чувствува цената на „малите задоволства“. По завршувањето на владините мерки, угостителските услуги и прехранбените производи во земјата бележат значителен пораст на цените. Ова, според Стојанче Кашиковски, претседател на Синдикатот на работниците од угостителството, туризмот, комунално-станбеното стопанство, занаетчиството и заштитните друштва на Македонија, не ја одразува реалната економска состојба на граѓаните, особено на работниците.
- „Апсолутно е нереално еспресо да чини 150 денари“, изјави Кашиковски по потпишувањето на Меморандумот за соработка со партнери од Италија, Бугарија и Малта.
Тој посочи дека многумина граѓани не можат да си дозволат да се напијат кафе на плоштад, бидејќи цените се енормно скапи.
Кашиковски ја поткрепи својата изјава потсетувајќи на податоците од Државниот завод за статистика, кои покажале инфлација од околу 3,3 отсто во периодот мај-април, по завршувањето на мерките за замрзнување на цените на производите. Освен проблемот со високите цени, Кашиковски алармираше и за одливот на работна сила од секторите угостителство и туризам.
Според експертите од пазарот, цените на кафето се под влијание на повеќе фактори: порастот на светските цени на сурово кафе, повисоките трошоци за кирија и работна сила, особено на фреквентни локации како плоштадот, како и општиот инфлациски притисок, кој оваа година во секторот на гастрономијата достигна ниво од над 6%.