УХМР предупреди на променливо облачно и нестабилно време денеска, со локален пороен дожд и грмежи. Наместа процесите ќе бидат поинтензивни во форма на невреме со пообилен пороен дожд за кратко време (над 15л/м2), силен ветер (над 60км/ч) и изолирана појава на град.
Минималната температура ќе биде во интервал од 13 до 20, а максималната ќе достигне од 25 до 32 степена.
Во Скопје, променливо облачно и нестабилно со пороен дожд и грмежи. Во делови од котлината ќе има појава на невреме со пообилен пороен дожд, силен ветер и изолирана појава на град.
Метеорологот Владо Спиридонов предупредува дека како резултат на прилив на поладен воздух кој како клин ќе се пробие во делови од североисточна Италија, Словенија и Истра, ќе се формира висински циклон со центар над среден Јадран. Во текот на денот овој циклон ќе се поместува кон јужниот Јадран и Јонско Море.
Во состав на оваа циклонска циркулација, од Јонско Море и Јадранот кон нашите предели ќе се разменуваат влажни и нестабилни бранови со развој на конвективна облачност и локални обилни врнежи.
