Силното невреме што попладнево ја зафати Македонија, проследено со пороен дожд и град, предизвика поплави и штети во повеќе градови и региони низ државата, информира Центарот за управување со кризи (ЦУК).
Во Скопскиот регион, освен проблемите со поплавени подвозници, улици и кружни текови, имало пријава и дека водата навлегла во просториите на Македонската академија на науките и уметностите (МАНУ), каде што се поплавени подрумите и гаражите, а вода има и во главниот хол, и во амфитеатарот.
Пријавено било и полнење на Усјанскиот Канал на улицата „Божин Николов-Силни“ во Горно Лисиче, каде што постои опасност од прелевање во дворовите. Зголемено ниво на водата бележи и реката Серава кај улицата „Призренска“ во Бутел.
„Кризниот штаб и екипите на јавните претпријатија се на терен. Граѓаните не се сами!“, порача градоначалникот Орце Ѓорѓиевски. „Екипите на Град Скопје ќе бидат на располагање во текот на целата ноќ и ќе интервенираат секаде каде што ќе биде потребно. Не можеме да го запреме невремето, но можеме организирано, одговорно и заеднички да спречиме поголеми штети. Ги повикувам граѓаните на внимателност, смиреност и соработка со надлежните служби“.
Силниот дожд предизвика сериозни проблеми и во Куманово, кадешто се пријавени поплавени подрумски, а од ЦУК додаваат дека екипите на Територијалната противпожарна екипа и комуналните претпријатија работат на терен.
Во Полошкиот Регион најкритично е во селото Нераште во Општина Теарце, кадешто поради недоволниот капацитет на каналскиот систем, атмосферските води поплавиле дел од селото околу новата џамија.
Невремето проследено со силен ветер предизвика прекини во сообраќајот и штети на возила во Велешкиот и во Струмичко-радовишкиот регион.
Во Велес екипи на ЈКП „Дервен“ отстранувале паднато дрво кај Ликовниот салон, а „Македонија пат“ интервенирала во четири наврати – трипати на автопатот Скопје–Градско поради паднати дрвја и еднаш на патот Велес–Градско поради одрон.
Во Кавадарци се интервенирало на патот кон Витачево, а во Свети Николе се испумпувала вода во селото Ерџелија.
Во Струмица ветерот соборил дрво, електрично броило, како и жици и бандери. Во Радовиш, пак, паднато дрво оштетило автомобил, а поплавени се и три градски улици.