Бугарскиот историчар Пламен Павлов тврди дека универзитетот „Свети Кирил и Методиј“ во Скопје не е основан во 1949 година, туку шест години претходно од Бугарија!
„Скопскиот универзитет ‘Св. Кирил и Методиј’ не создаден во текот на 1948 и 1949 година, како што упорно се тврди во Република Северна Македонија, туку во 1943 година од ‘бугарскиот фашистички окупатор’, како што велат тие. Бугарија вложи многу напори за културата, образованието и инфраструктурата на денешната територија на Северна Македонија, а дел од тоа е и основањето на универзитетот“, изјави Павлов за бугарскиот портал „Актуално“, прашувајќи зошто на фасадата на УКИМ не пишувало дека е основан во 1943 година.
Причина за неговата реакција е оспорувањето од новинар во Македонија на дипломата на кандидатот за нов македонски министер за земјоделство, шумарство и водостопанство Борче Серафимовски од универзитетот „Св. св. Кирил и Методиј“ од Велико Трново, кадешто Павлов е долгогодишен професор.
УКИМ е најголемиот универзитет на македонски јазик, основан на 24 април 1949 година со три факултети, а денес претставува заедница на 23 факултети, 9 научни институти (5 составни и 4 кои соработуваат со универзитетот) и 8 други институции.