Македонија

Нов систем на плати, вработувања и одговорност – Собранието ги донесе законите за судска и јавнообвинителска служба

Пратениците во Собранието ги изгласаа законите за судска и јавнообвинителска служба. Со 61 глас „за“ и 12 „против“ се донесе законот за судска служба.

Новиот Закон за судска служба ги надминува долгогодишните слабости во функционирањето на судовите и создава услови за поефикасна организација на работата преку јасно дефинирање на статусот, правата и обврските на судските службеници. Една од најзначајните новини е што судските стручни службеници добиваат статус на посебни административни службеници, односно стануваат посебна категорија вработени во рамки на судската власт со сопствен законски режим. Со тоа, како што наведуваат од Министерството, се овозможува подобро препознавање на специфичностите на нивната работа и поголема професионализација на службата.

Законот предвидува и нов систем за класификација на работните места, со дополнување на категориите, нивоата и звањата согласно реалните потреби на судовите. На овој начин треба да се надминат проблемите што со години произлегуваа од примената на модел преземен од општата администрација, кој не ги одразуваше специфичните потреби на судскиот систем.

Дополнително, се воведува нов систем на вработување и унапредување прилагоден на судската служба, а значително се зајакнува и институционалната независност на судската власт. Судскиот буџетски совет добива централна улога во кадровското планирање, без потреба од претходна согласност од извршната власт.

Со новото законско решение се менува и начинот на пресметка на платите. Зголемувањата обезбедени преку колективните договори ќе станат составен дел од основната плата, што според Министерството ќе овозможи постабилен, попредвидлив и поправеден систем за вреднување на трудот на судските службеници. Законот дополнително го уредува и статусот на судската полиција, чии припадници добиваат бенифициран работен стаж, како и статусот на останатите категории вработени во судовите преку јасно дефинирани права, обврски и одговорности.

Истовремено, пратениците го усвоија и Законот за јавнообвинителска служба, кој има за цел да ја зајакне самостојноста, професионалноста и ефикасноста на јавното обвинителство. Со новите решенија се воспоставува посебен систем за управување со човечките ресурси, со поедноставени процедури за вработување и намалена зависност од надворешни институции при изборот на кадри. Од Министерството посочуваат дека тоа ќе овозможи побрз избор на најстручните и најквалитетните кандидати.

Посебен акцент е ставен на кариерниот развој на јавнообвинителските службеници. Законот предвидува јасна вертикална структура за напредување и можност за професионален развој до највисоките раководни позиции во службата. Дополнително се зајакнува и улогата на Советот на јавнообвинителска служба, кој добива пошироки надлежности во областа на кадровската политика, дисциплинската одговорност и заштитата на правата на вработените.

И кај обвинителската служба е предвиден нов систем за пресметка на платите, со кој покачувањата договорени преку колективните договори ќе бидат вклучени во основната плата. Според Министерството, ова ќе придонесе за поголема финансиска сигурност, подобра мотивација и поправедна валоризација на трудот на вработените.

Законот воведува и потранспарентен систем на дисциплинска одговорност, со прецизно дефинирани дисциплински повреди, дисциплински комисии и можност за жалба пред Советот на јавнообвинителска служба. Од Министерството за правда оценуваат дека со усвојувањето на двата закона се прави значаен чекор кон исполнување на реформските цели во правосудството и создавање поефикасен, независен и професионален судско-обвинителски систем.

Најнови вести од: Македонија

Велјановски до опозицијата: Не може да се заборави како ја пљачкавте државата

На денешната собраниска седница на Комисијата за финансирање и буџет каде се дискутираше Предлог-Буџетот за 2027 година, пратеникот од ВМРО-ДПМНЕ, Александар Велјановски, кажа дека и покрај долговите наследени од претходната влада, предводена од СДС, кои се тежок товар за државата, оваа Влада предводена од ВМРО-ДПМНЕ ќе продолжи со силни инвестиции, со работа на фискална консолидација, но и со зајакнување на здравствената и социјалната заштита на граѓаните.

Ристески: Клучен приоритет на Владата е да ги задржи младите во Македонија

Законот за сезонски работници што е во сила од 1 јануари 2026 година, сѐ уште не ги дава очекуваните резултати, но ова не е закон направен за една година. Затоа организираме информативни средби и настани со помош на медиумите, стопанските комори, работодавачите и синдикатите – за да ги анимираме луѓето дека пензионери, студенти, оние кои сакаат дополнително да работат и сите категории невработени лица можат да го искористат, без притоа да го изгубат стекнатиот статус, да имаат комплетно пензиско и здравствено осигурување, фер ангажман, платен работен час колку што се ангажирани дополнително и со тоа да остварат дополнителни приходи – рече денеска заменик-министерот за економија и труд, Марјан Ристески.

Општина Охрид ги засилува активностите за затворање на депонијата „Буково“ и воспоставување нов систем за комуналниот отпад

Завршена е постапката за избор на проектант за изработка на техничката документација за затворање на нестандардната депонија „Буково“, а во тек се и активностите за изградба на претоварна станица кај Мауцкер и собирен центар во Охрид. Претоварните станици и Регионалниот центар за управување со отпад во Новаци се очекува да бидат функционални во 2030 година. Ова беше истакнато на денешната средба во Општина Охрид, посветена на новиот Регионален план за управување со отпад и воспоставувањето интегриран систем за Југозападниот и Пелагонискиот плански регион.

Зафировски за признанието на Михаилова за ДАНС: Ова е бугарска пародија, во која самата се излаја за поврзаноста со тајните служби

Срамота и давање автогол, бугарска пародија во која Ива Михаилова самата недоветно се излаја за улогата на тајните служби и бугарската ДАНС во целиот нејзин „случај“, посочи безбедносниот аналитичар Воислав Зафировски во „За македонските работи“ со Љупчо Цветановски. Недораснато дете кое избрза и искрено си кажа се што треба и не треба, класичен автогол во полза на Македонија за случај кој беше поддржан и од највисоките бугарски функционери.

Муцунски: Проширувањето на ЕУ е геополитичко обединување на Европа и стратешка инвестиција во постабилен и побезбеден континент

Министерот за надворешни работи и надворешна трговија Тимчо Муцунски синоќа во Скопје се обратил на конференцијата „Безбедноста во Западен Балкан“, организирана од германскиот институт „Аспен“ (Aspen Institute Germany) во соработка со Министерството за надворешни работи и надворешна трговија.

„КАЖИ НЕ!“ – кампања на МВР против сексуалната злоупотреба на деца во дигиталниот простор (ВИДЕО)

Целта на кампањата е да се подигне свеста кај децата, младите, родителите и пошироката јавност за препознавање и спречување на сексуалната злоупотреба во дигиталниот простор

Најнови вести

To top