Од денес, 1 декември 2025 година, Македонија влегува во ново доба на сообраќајната дисциплина. Започна пробниот период на системот „Безбедна држава“ – електронските очи на градот повеќе нема да трепкаат. Секој прекршок ќе биде снимен, секој сторител ќе добие СМС и е-пошта, а толеранцијата за пречекорување на брзината официјално е нула – без разлика дали сте во населба или на отворен пат.
Во првата фаза системот „Безбеден град“ ќе ги лови четирите најчести гревови: пребраза возење, поминување на црвено светло, истечена сообраќајна дозвола и непрописно паркирање. Подоцна списокот ќе се прошири.
„Ова не е казнување, туку одговорност. Кој признае веднаш – плаќа половина глоба во рок од 8 дена. Кој сака да се суди со судбината – плаќа цело по истекот на тој рок, но пред да почне присилната наплата“, објаснува портпаролот на МВР, Гоце Андреевски.
Плаќањето е електронско, брзо и едноставно – со еден клик на линкот што го добивате во пораката. Штом парите легнат на сметка, МВР веднаш добива потврда. За странци и за оние што планираат да „избегаат“ во странство – глобата мора да се плати веднаш, без одлагање.
Ако прекршокот носи и негативни бодови или забрана за возење, дури и да платите навреме, случајот автоматски оди на суд.
Од денеска на улица не постои „не ме видеа“. Ве видеа. И ве чекаат.