Обвинителството за гонење организиран криминал и корупција поднесло обвинение затоа што е убедено дека има докази чии се парите скриени во ѕидот на куќа на судијата од Апелационен суд, Ѓоко Ристов.
Предходно во домот на неговите родители во Неготино беа пронајдени 350.000 евра заѕидани во кујната, при што се тврдеше дека потекнуваат од продажба на ниви. Обвинителството денеска соопшти дека има цврсти докази дека парите потекнуваат од незаконски дејствија.
Ристов, беше поврзуван со случајот на поранешниот правобранител, и сегашен адвокат Фехми Стафа, кој од вчера е во затворот во Шутка откако призна дека барал мито од 100.000 евра за да влијае кај судија.
„Во текот на детална истражна постапка, јавен обвинител од Основното јавно обвинителство за гонење на организиран криминал и корупција ги обезбеди сите докази кои ја потврдуваат основаноста на сомненијата дека обвинето лице што врши јавни овластувања – адвокат побарал вкупно 100.000 евра, а на 13.12.2025 година директно примил износ од 20.000 евра за да посредува со искористување на своето реално влијание врз судија од Апелациониот суд Скопје за укинување на мерка притвор определена кон лице кое тогаш било недостапно на органите на прогонот.
Соочен со доказите на обвинителството, обвинетиот целосно ги призна и прифати наводите во обвинението, по што побара да се спогоди за висината на кривичната санкција“, соопшти Обвинителството.
Основниот кривичен суд Скопје вчера изрече пресуда со која го осуди Стафа на ефективна казна затвор од 1 година и 3 месеци за кривично дело – Примање награда за противзаконито влијание.
Со прифаќање на предлог спогодбата, Стафа ги потврдил и наводите во обвинението согласно кои побараните пари биле со намена со поткуп да влијае врз конкретен судија од Апелациониот суд во Скопје за да издејствува укинување на мерка притвор.
„Иако во конкретниот случај адвокатот бил фатен “ин флагранти” со дел од поткупот и тие пари не стигнале до судијата, јавниот обвинител презеде и повеќе други дејствија и претреси при кои на 18.01.2026 година во домот на родителите на судијата во Неготино, пронајде вкупно 350.000 евра за чие потекло тој нема доказ и не ги пријавил. Парите беа пронајдени спакувани во 13 поединечни пакувања, и тоа вкупно 610 банкноти во апоени од по 500 евра и 225 банкноти во апоени од по 200 евра, од кои дел со обележани рачно испишани износи на средствата, скриени во заѕидан простор во шуплините од цигли во ѕидот на една од собите“, пишува во соопштението.
Од обвинителството наведуваат дека ова предизвикало основано сомнение дека Ристов во периодот од 10.02.2020 година, како службено лице судија во Апелациониот суд Скопје, спротивно на законската должност за пријавување на имотна состојба или нејзина промена давал лажни податоци за својот имот и имотот на неговото семејство и не пријавил имот кој во големи размери ги надминува неговите законски приходи.
„Од поведувањето на постапката јавниот обвинител презеде повеќе дејствија со кои обезбеди цврсти докази во однос на сопственоста на паричните средства, со што се потврдија елементите кои го исполнуваат битието на кривичното дело – Противправно стекнување и прикривање имот од член 359-а. Имајќи го предвид доказниот материјал за располагање со имотот во периодот од 2020 година до денес, во корелација со начинот искористен за криење на пронајдените парични средства, се обезбедија докази кои укажуваат на обележја и на кривичното дело – Перење пари и други приноси од казниво дело од член 273 од Кривичниот законик“, соопшти Обвинителството.
Од таму соопштија дека денеска е поднесено обвинение против Ристови дека надлежниот јавен обвинител продолжува да презема дејствија до целосно испитување на сите аспекти на сомнежите за коруптивни дејствија и потенцијална инволвираност и на други лица.