Ќе станат ли минато гужвите, односно големиот метеж на граница каде се чекаше со часови?! На граничниот премин „Табановце-Прешево“ со Србија ќе биде ставен во функција системот One Stop за заедничка интегрирана контрола. На свеченото отворање на One Stop системот ќе бидат присутни министрите за внатрешни работи на Македонија и Србија, Панче Тошковски и Ивица Дачиќ.
Воведувањето на овој систем, според изјавата на министерот Тошковски, ќе овозможи многу поекспедитивен проток на граѓани на „Табановце-Прешево“, кој во моментов е најоптоварениот граничен премин во земјата. Овој современ начин на контрола има за цел да ја намали гужвата на границите, особено во текот на летните месеци кога патувањата се поинтензивни.
One Stop системот веќе функционира со Косово на преходите Блаце и Јажинце. Во тек се преговори и со Албанија за воведување на овој систем на два гранични премини, додека со Бугарија и Грција, како членки на ЕУ и на Шенген-зоната, ќе се имплементираат само организациски подобрувања.