Од 31 октомври 2025 година, Скопје ќе добие нова директна авиолинија до Ларнака, Кипар – објави денеска вицепремиерот и министер за транспорт и врски Александар Николоски на својот официјален профил на Фејсбук.
- „На пат кон Охрид за одбележувањето на празникот Св. Кирил и Методиј сакам да споделам информација за нова авиолинија. Од 31.10.2025 започнува новата авиолинија Скопје – Ларнака Кипар! Ова е 11-та нова линија за 10 месеци, а е резултат на политиките на Владата на ВМРО-ДПМНЕ“, напиша Николоски.
Тој додаде дека субвенциите и владините политики за развој на нови воздушни линии веќе даваат резултати и најави продолжување на напорите за унапредување на авиосообраќајот во земјата.
Официјалната потврда доаѓа откако министерот за транспорт, Александар Николоски, вчера на свеченоста по повод 15-годишнината на ТАВ Македонија најави дека е потпишан договор за субвенции за 11-тата дестинација од скопскиот аеродром – но без да ја открие дестинацијата. Сега е јасно: станува збор за Ларнака.