Во услови на зголемена глобална неизвесност и динамични економски текови, финансиската писменост сè повеќе се наметнува како суштинска вештина како за пошироката јавност, така и за сите кои активно управуваат со капитал.Во таа насока, на Економскиот факултет – Скопје при Универзитетот „Св. Кирил и Методиј“ се одржа гостинско предавање од страна на Иван Ивановски, основач на Prime Capital и креатор на primeclass.mk – водечка едукативна платформа за инвестирање и дневно тргување во Македонија и регионот. Предавањето беше реализирано во рамки на Quant Talks, во организација на Катедрата за математика и статистика, а се одржа во салата за состаноци на професорите, пред професори, доктори на науки и студенти. Во фокусот на предавањето беше влијанието на геополитичките случувања врз финансиските пазари, при што беа анализирани актуелни глобални теми како воени конфликти, политички тензии и економски политики, и нивното директно влијание врз движењата на светските берзи и инвестициските стратегии.
Посебен акцент беше ставен на делот на финансиските контракти нивната структура, механика и практична примена на пазарите. Преку конкретни примери, присутните имаа можност подетално да се запознаат со начинот на кој овие инструменти се користат за управување со ризик, оптимизација на портфолио и позиционирање во услови на нестабилни пазари. Во рамки на дискусијата, накратко беше опфатено и инвестирањето преку индексни фондови, како дел од поширокиот пристап кон современото инвестирање. На предавањето присуствуваа и активно учествуваа во дискусијата професорите Драган Тевдовски, Игор Ивановски, Леонид Наков и Борче Треновски, чие присуство придонесе за дополнителна стручна длабочина и квалитетна размена на мислења.
„Нашата цел не е да предвидиме што точно ќе се случи на пазарите, туку да изградиме начин на размислување. Во услови на неизвесност, најголемата грешка е импулсивната реакција. Наместо тоа, клучно е да се остане доследен на стратегијата да се задржат позициите и, кога постои основа, да се искористат можностите за дополнително инвестирање. Геополитиката не е теорија, туку фактор што директно влијае врз капиталот, а контрактите се еден од инструментите преку кои тој ризик може да се разбере и управува. Финансиската писменост значи разбирање на процесите, а не реагирање на настаните,“ истакна Ивановски за време на предавањето.
Настанот претставува уште една потврда за значењето на поврзувањето помеѓу академската заедница и практичната индустрија, со цел унапредување на знаењето и подготвеноста на новите генерации. Од Економскиот факултет во Скопје истакнаа благодарност до Иван Ивановски за квалитетното предавање и значајниот придонес кон приближување на финансиските пазари до академската заедница.
Prime Class и Prime Capital продолжуваат со активности насочени кон подигнување на финансиската писменост и приближување на финансиските пазари до пошироката јавност, со јасна визија за создавање поинформирана и економски подготвена заедница.