Во Деканатот на Медицински факултет – Скопје, за првпат во Македонија се одржа дводневен хибриден семинар на тема „Хемостаза во хирургија“, реализиран преку моделот „Пациентот во центарот на интердисциплинарниот тимски пристап“.
Пациент-центрираниот интердисциплинарен тимски пристап претставува современ модел на здравствена грижа во кој различни здравствени професионалци соработуваат за да обезбедат сеопфатна, координирана и индивидуализирана нега, при што пациентот е во центарот на сите одлуки.
Семинарот беше организиран во взаемна соработка помеѓу швајцарската меѓународна платформа VFPM – GIGANODE, која обединува над 200 академски контрибутори од целиот свет, Катедрата по анестезија при Медицинскиот факултет во Скопје.
На дводневниот симпозиум учество зедоа еминентни експерти од Швајцарија, Романија, Грција, Србија и од Македонија.
Досега, преку оваа програма – која веќе е реализирана во Грција, Италија, Хрватска, Австрија и Турција – се обучени 40 доктори од Македонија, а со новиот настан дополнително се едуцираа уште 30 наши доктори.
Заедничката цел на ваквите едукации е јасна:
– Градење и одржување глобална мрежа на научници и клиничари
– Примена на глобалното знаење во локални услови
– Претставување на локалните искуства во глобалниот контекст
– Развој на мултидисциплинарен пристап во третманот на пациентите
Придобивките од ваквиот пристап се значајни:
– Подобри здравствени резултати
– Поголемо задоволство на пациентите
– Подобра координација и ефикасност
– Намалување на трошоци и хоспитализации
„Науката нема граници. Кога знаењето се споделува, тоа станува сила што ги обединува експертите и директно го унапредува квалитетот на грижата за пациентите. Верувам дека преку научна соработка и размена на искуства градиме систем во кој пациентот е во центарот на секоја одлука“, нагласува проф. д-р Марија Јовановска-Срцева, еден од организаторите на овој хибриден симпозиум.
