Поранешниот функционер на СДСМ и поранешен градоначалник на Скопје, Петре Шилегов, во емисијата „Тема на денот“ на Сител остро го критикуваше актуелното раководство на партијата, оценувајќи дека СДСМ „кадровски се испразнил“ и дека е во длабока криза.
„Ќе се обидеме да дојдеме до здрава политичка логика и да ги замолиме луѓето што ја раководат партијата, повеќе да не го прават тоа. Да дојдат некои други да ја раководат партијата“, рече Шилегов.
Тој најави дека наскоро „поголема група социјалдемократи“ ќе побара оставка од сегашното раководство, при што процесот ќе биде воден од лица кои „политички израснале во СДСМ“ и кои, според него, се уште веруваат во основните вредности на партијата.
Шилегов оцени дека слабоста и безличноста на СДСМ ги туркаат критички настроените граѓани кон Левица, која во моментов се позиционира како главна опозициска алтернатива.
„Кај граѓаните опозициското чувство е високо, но кај вака организиран СДСМ – безличен и без можност да привлече нови гласови, треба да се бара поинаков пристап“, рече тој.
Неговите изјави доаѓаат во време кога СДСМ се соочува со сериозен пад на поддршка, внатрешни поделби и критики за неспособност да се консолидира опозицијата против актуелната власт. Шилегов, кој беше еден од видните лица на партијата во минатото, со ова отворено го предизвикува актуелниот лидерски тим и сигнализира можен организиран бунт од поранешни и сегашни членови.