Не само описот на едноминутното „видување“ на маргините на настан во Брисел, туку и недипломатскиот опис со користење на омразената географска одредница кај огромното мнозинство Македонци ја испровоцираа реакцијата од македонскиот министер за надворешни работи Тимчо Муцунски за изјавата на неговата нова бугарска колешка Велислава Петрова-Чамова.
„Овој став (дека Македонија мора да ги исполни преземените обврски со т.н. Француски договор од 2022 година – н.з.) денеска исто така беше реафирмиран. Се радувам дека во врска со неа имаме многу широк политички консензус во Бугарија. Тоа им го кажав и на нашите северномакедонски партнери. Од нивна страна очекуваме активности што ќе покажат дека имаа целосна политичка подготвеност да чекорат напред по својот европски пат“, е делот од изјавата на Петрова-Чамова што дополнително ја прелеа чашата кај Муцунски.
„Би сакал да потсетам дека користењето на терминот ‘северномакедонски’ за означување на македонскиот народ е неточно и несоодветно. Македонците се Македонци. Ова не е прашање на политика, туку на основно почитување на идентитетот и достоинството на еден народ. Во дипломатијата, прецизноста не е формалност. Таа е одраз на почит“, ѝ реплицира шефот на македонската дипломатија.