Министерот за дигитална трансформација, Стефан Андоновски, ја претстави „СМАРТ/МК 2030“ – новата Национална стратегија за информатичко-комуникациски технологии, прв сеопфатен план за дигитален развој по осум години.
Овој документ служи како патоказ за дигиталната иднина на Македонија, усогласен со европските стандарди од Дигиталната декада 2030 и локалните потреби. Како земја кандидат за ЕУ, стратегијата ги следи четирите клучни цели на Европската дигитална агенда до 2030:
- Дигитално обучени граѓани и квалификувани ИКТ експерти;
- Безбедна и поврзана инфраструктура;
- Дигитализирани јавни услуги;
- Дигитално интегрирани бизниси.
Според Андоновски, стратегијата ја зајакнува институционалната соработка со ЕУ, овозможува пристап до европски програми, финансиска поддршка и техничка помош, правејќи ја Македонија активен партнер во европската дигитална заедница.
Стратегијата е резултат на инклузивен процес со десетици јавни расправи, онлајн консултации и вклучување на над 300 експерти од институции, стопански комори, НВО, универзитети и ИКТ секторот. Сите препораки и приоритети се базирани на консензус за обединување на општествените сектори.
Претставена е со Акциски план за имплементација, фокусиран на конкретни чекори, јасни индикатори и континуирана евалуација.