Романот “Луција” на новинарката Лилјана Грџо Дамовска во издание на ,,Сакам книги” наскоро ќе добие свое продолжение.
Големиот интерес на читателите за судбината на главниот лик, Луција e мотив Дамовска да ја продолжи приказната за жената борец, за храброста да се направат различни избори и нови животни почетоци.
Книгата беше промовирана на последниот Саем на книгата што се одржа на крајот на април во Скопје и како што дознава expres.mk за неполни три месеци целиот тираж е речиси распродаден.
Во еден поширок контекст, “Луција” е важен роман затоа што отвора нова страница во македонската проза за жената по четириесеттата, лик кој досега ретко добивал комплексен книжевен третман. Таа не е ни мит, ни жртва, ни карикатура, туку човечна, интелигентна и чувствителна личност која повторно го освојува својот простор во светот.
Во таа смисла, романот на Дамовска може да се чита како дел од една нова, зрела женска проза која се движи помеѓу интимната исповед и општествената критика, меѓу другото напишаа критичарите.
Дамовска е дипломиран новинар, магистер по културолошки студии, колумнист, коментатор, која целиот работен и животен век го посвети на новинарството и на афирмација на културните вредности.
Беше уредник во најтиражниот дневен весник Дневник, главен уредник на реномираниот магазин Теа модерна, творец и главен уредник на списанието Леона, помошник на главниот уредник во весникот Вечер, уредник на специјализирани додатоци и прилози, на издавачка програма и друго.
Колумните со наднаслов ,,Огледало” со години беа критичкото огледало на културни, социјални и општество-политички појави и настани, а дел од нив се објавени во книгата Светска женска (2015).
Автор е на неколку стотици интервјуа со значајни личности од земјава и странство. Силен поддржувач е на културниот активизам, инициjатор на неколку фестивали, на здруженија, востановување на награди (Актер на годината) и признанија за заслужни уметници од различни области на културата.
Луција е нејзин прв роман.