На 65-годишна возраст, по кратко боледување, почина Коста Јаневски, истакнат филмски работник и еден од основачите и сопствениците на радио Антена 5, чиј придонес во македонската медиумска и културна сфера беше значаен и траен.
Тој учествуваше во основањето на Антена 5, во нејзиниот технички развој и креирањето на програмата, а од 1994 година ја извршуваше функцијата технички директор. Јаневски беше клучен во техничката и програмска реализација на многубројни домашни и меѓународни музички и културни настани пренесувани на брдите на радиото: Британските музички награди, MTV Европските музички награди (MTV EMA), Зимската музичка конференција во Мајами, Викенд Медиа фестивалот, Егзит, Таксират, Интернационалниот фестивал на филмска камера „Браќа Манаки“ и Д Фестивал во Дојран.
Пред основањето на Антена 5, Јаневски беше дел од програмата на Радио Микс на Радио УНО и проектот Радио Топ Листа на Македонија. Дипломиран на Електротехничкиот факултет, тој ја започна својата кариера во филмската индустрија во осумдесеттите години како монтажер на тон и тон снимател. Во 1985 година работеше како слободен филмски работник во Друштвото на филмски работници на Македонија, а од следната година се приклучи на продуцентската куќа „Вардар филм“. За време на својата богата кариера, учествуваше во реализацијата на филмски проекти од домашна продукција и странски копродукции, вклучувајќи играни, документарни, краткометражни и долгометражни филмови како „Македонска сага“, „Среќна Нова ’49“ и „Тетовирање“, меѓу многу други.
Јаневски беше активен член на Друштвото на филмски работници на Македонија и на Здружението на тонски сниматели на Македонија, каде што остави траен отпечаток во професионалните кругови.
Погребот ќе се одржи в среда, на 29 октомври 2025 година, во 11:30 часот, на Градските гробишта Бутел во Скопје.