Членството на Македонија во Европската унија го поддржуваат помалку од половината или 48 проценти анкетирани во последното истражување на јавното мислење на Евробарометар.
Според статистичката агенција на Унијата, толкава поддршка за влез во ЕУ имаат и Босна и Херцеговина, и Молдавија.
Најголема поддршка, малку над половина од учесниците во анкетата, има за влезот на Украина, а по неа е Црна Гора со 51 отсто.
За разлика од нив, Турција не е претпочитан кандидат за членство во ниту една од земјите-членки на ЕУ – само две петтини од анкетираниоте би го поддржале нејзиното присоединување дури и ако ги исполни критериумите.
Повеќе од половина од учесниците во анкетата се за проширување на Унијата, но само еден од десетмина се категорично „за“.
Во 23 земји-членки најмалку 50 проценти од испитаниците се за понатамошно проширување, а најголема поддршка има во Шведска (79 отсто), Данска (75 отсто) и Литванија (74 отсто).
Македонија, Украина, Црна Гора, Босна и Херцеговина, Молдавија, Србија, Грузија, Албанија, Косово и Турција се десетте земји кои сакаат да се приклучат кон ЕУ.