Ексминистерот за надворешни работи на Италија, Луиџи ди Мајо, преку видеопорака изрази поддршка за кандидатот за градоначалник на Чаир од коалицијата „Национална алијанса за интеграција“ и поранешен шеф на македонската дипломатија – Бујар Османи.
Видео пораката на Ди Мајо ја објави Демократската унија за интеграција на својот Фејсбук профил.
Во неа поранешниот италијански министер порача дека Османи е голем пријател на Европа и Европската Унија.
„Тој е почитуван пријател во Европа. Многу добро се сеќавам на неговите напори за зајакнување на односите меѓу Северна Македонија и Европската Унија, како и на неговите амбиции за доближување на земјата до членството“, и дека Османи е голем пријател на Италија:
„Работевме заедно за да ги зближиме нашите земји и народи. Се сеќавам на неговите зборови полни со гордост за дијаспората и важноста на граѓаните на двете земји во зајакнувањето на врските меѓу нашите нации и влади“.
Најважно, како што рече Ди Мајо, е тоа што во него гледа многу добар пријател и сигурен политичар. Поранешниот италијански министер додаде дека Османи секогаш може да смета на него и дека ја има неговата поддршка во новиот предизвик како кандидат за градоначалник на Чаир.
„Ви посакувам среќа во новиот предизвик. Убеден сум дека сериозни, способни луѓе и силни бранители на својот народ секогаш ќе имаат поддршка, порано или подоцна, во секоја политичка трка. Со среќа кандидатурата, со среќа на вашите граѓани и вашата држава“, вели Ди Мајо во пораката.
Поддршка за градоначалничката канддатура досега на Османи му дадоа Жосеп Борел и актуелниот МНР на Украина Дмитро Кулеба.
