Министерот за надворешни работи и надворешна трговија Тимчо Муцунски во гостување на ТВ Сител вечерва информира дека повеќе лица се повикани на разговор во полициска станица за ширење лажни информации дека во водата за пиење во Скопје е присутна бактеријата ешерихија коли.
„Како што сум информиран, Министерството за внатрешни работи има повикано повеќе лица на информативен разговор и, според мене, мора да има одговорност за ова што се случува. Не може туку така да споделувате ваков тип информации и да ширите масовна хистерија и паника кај граѓаните. И според мене, ова е дело на најголемата опозициска партија во државата, којашто една година создава хистерија – ќе нема плати и пензии, ќе има мигранти, надворешната политика не функционира, а денеска дознавме дека бактериолошки е загадена водата во главниот град?!“, изјави Муцунски.