По повод почетокот на новата учебна година во сите основни и средни училишта во Република Македонија, денес, на 1 септември 2025 година, во 10 часот претседателот на Владата на Република Македонија Христијан Мицкоски, придружуван од министерката за образование Весна Јаневска, ќе го го посети основното училиште „Кирил Пејчиновиќ“ во општина Кисела Вода. Како што информираа од прес-службата на Владата на Република Македонија, предвидено е потоа премиерот Мицкоски да даде изјава за медиумите.
„Во рамки на учебната 2025-2026 година настава ќе има до 10 јуни, а исклучок ќе бидат матурантите за кои редовните часови ќе траат до 15 мај. Обезбедени се учебници за сите ученици, а за прв пат по седум години ќе има и учебници по странските јазици. Во повеќе училишта условите за настава се значително подобрени, а опфатот на ученици е кренат на повисоко рамниште со ангажирање зголемен број образовни асистенти во основното, но и за прв пат во средното образование. Учениците ќе се запознаваат со придобивките од вештачката интелигенција и ќе учат етички да ја користат за образовни цели.“ – изјави министерката за образование и наука проф. д-р Весна Јаневска на вчерашната прес-конференција, посочувајќи дека се очекува повисок квалитет на наставниот процес во споредба со изминатите години.
„Втора учебна година по ред започнува со учебници за сите ученици. Целосно нови учебници има за седмо одделение во основното образование и за прва година во гимназиите, поради примената на нови наставни програми. Обновата на наставните содржини ќе продолжи. За прв пат после седум години, учениците ќе добијат и учебници по странски јазици – англиски, француски, германски и италијански јазик.“ – укажа Јаневска, нагласувајќи дека сите учебници се испечатени и над 90 отсто од тиражот е веќе испорачан.
Таа рече дека започнува примената на нов електронски дневник, кој е значително подобар од претходниот и оти наставниците ќе можат да се најават и пополнуваат податоци во секој момент. „Верувам во квалитетите на наставниците и очекувам мотивирани да ја започнат новата учебна година, во која секако, ќе имаат и ново зголемување на платите, онака како што се договоривме пред 1 година, од 7,5 отсто до 10 отсто во зависност од степенот на инфлацијата, за да имаме реален раст без манипулации, како што правеа претходните структури.“ – додаде министерката за образование Јаневска.
Во новата учебна година, обезбедена е поголема поддршка за талентираните ученици, односно целосно покривање на трошоците за учество на меѓународни научни олимпијади. За сите ученици е овозможено професионално, односно кариерно насочување. – информираше новинската агенција „Нетпрес“.