Претседателката Гордана Сиљановска-Давкова порача дека Македонија останува цврсто определена кон членството во Европската Унија, но очекува да биде третирана рамноправно и да биде оценувана според Копенхашките критериуми, а не преку билатерални спорови и идентитетски прашања.
На заедничката прес-конференција со словачкиот претседател Петер Пелегрини, Сиљановска-Давкова истакна дека двете земји ги поврзуваат силни историски, културни и духовни врски и изрази уверување дека посетата ќе придонесе за дополнително зацврстување на билатералната соработка.
Таа посочи дека постои голем потенцијал за продлабочување на економската соработка, особено во енергетиката, иновациите, зелената транзиција, инфраструктурата и туризмот, потсетувајќи на неодамнешните бизнис-форуми и отворањето на директната авиолинија Охрид–Братислава.
Претседателката посебно ја поздрави поддршката од Словачка за македонскиот јазик и култура, посочувајќи го отворањето на Лекторатот по македонски јазик на Универзитетот „Константин Филозоф“ во Нитра, како и воведувањето настава по македонски јазик и објавувањето на првиот учебник по македонски јазик за Словаци.
За евроинтеграциите
„Европа е наш природен дом – географски, историски и културно. Она што го бараме е да бидеме третирани како сите останати, да бидеме вреднувани според Копенхашките критериуми и да добиеме можност да се фокусираме на реформите и владеењето на правото, наместо на билатерални прашања“, порача Сиљановска-Давкова.
Таа го поздрави словачкиот став дека идентитетските и културните прашања не треба да бидат предмет на политички условувања во процесот на проширување на Европската Унија.