Познатата пејачка Џејла Рамовиќ од БиХ била приведена во акциска контрола во Кичево, заедно со нејзиниот бенд, откако полицијата открила дека настапувале без соодветна работна дозвола.
За време на засилената контрола во угостителските објекти долж патот Кичево-Охрид, припадници на Одделението за внатрешни работи Кичево и Регионалниот центар за гранични работи Запад влегле во локал каде токму тогаш настапувала дваесетитрогодишната ѕвезда од Босна и Херцеговина. Заедно со неа биле затекнати и членовите на бендот – К.Џ. (27), Е.П. (25), Ф.Ј. (28) и И.К. (24), сите државјани на БиХ.
Според официјалното соопштение на СВР Охрид, младите уметници настапувале без претходно издадена работна дозвола, со што го прекршиле Законот за странци.
По утврдувањето на прекршокот, целата група е приведена, а против нив е поднесена прекршочна пријава до Основниот суд во Кичево. Настапот што требаше да биде ноќ за паметење за публиката, за младите музичари заврши со сосема поинакво сеќавање.