Премиерот на Албанија, Еди Рама, изјави дека Албанија по пристапувањето во Европската Унија нема да го следи примерот на Бугарија и нема да издава албански пасоши на етничките Албанци кои живеат во Македонија.
„Ние не сме земја која може да прави што сака и како сака кога станува збор за прашања кои се однесуваат на внатрешната хармонија на европското семејство“, изјави Рама.
Тој посочи дека Бугарите го сториле тоа дури откако станале членка на ЕУ, „бидејќи нивниот пасош стана многу моќен“.
Изјавата на албанскиот премиер доаѓа во време кога Албанија бележи брз напредок кон отворање на преговорите и пристапувањето во ЕУ, додека Македонија останува блокирана поради отворените прашања со Бугарија, особено околу правата и статусот на бугарското малцинство.
Рама со оваа позиција јасно ја дистанцира Албанија од можноста за „пасошка политика“ кон етничките Албанци во соседството, за разлика од бугарскиот модел.