На првиот состанок меѓу лидерите на ВРЕДИ и премиерот Христијан Мицкоски, се разгледуваа можни предлози за заменување на одредени министри. ТВ21 неофицијално дознава од владини извори дека ВРЕДИ предлага Мухамед Хоџа за министер за екологија, кој би го наследил Изет Меџити во овој ресор откако тој беше избран за градоначалник на општина Чаир. Хоџа претходно служел како владин портпарол, предложен од ДУИ за време на коалицијата меѓу таа партија и СДСМ. Дали овој предлог ќе го добие одобрувањето од Мицкоски, ќе се знае по завршувањето на состанокот.
Неофицијално, владините промени би можеле да се однесуваат и на замениците-министри, каде во Министерството за внатрешни работи на местото на Астрит Исеини се споменува Беким Рамадани.
Пратеничката Саранда Имери од ВРЕДИ, во емисијата „Ајде да зборуваме“, истакна дека изборите за нови министри се базираат на евалуациите на перформансите на актуелните раководители.
„Во јавноста во последно време се појавуваат различни информации за замени на некои министри со нови имиња. Овие имиња не се само од коалицијата ВРЕДИ, туку и од ВМРО-ДПМНЕ. Сметам дека секоја политичка партија и секој лидер во рамките на владината коалиција ги направиле своите анализи и на крајот треба да дојдат до заклучок врз основа на перформансите на министрите кои ги раководат различните ресори“, вели Саранда Имери од ВРЕДИ.
Министерот за надворешни работи и трговија, Тимчо Муцунски, изјави дека преговорите продолжуваат и дека е оптимист дека ќе се најде заедничко решение. Во однос на распределбата на ресорите, тој потсети дека сите коалициски партнери мора да го стават акцентот на квалитетот, а не на бројот.
„Уврен сум дека во наредните денови ќе се постигне договор кој ќе ја зголеми ефикасноста на Владата. Една работа која премиерот ја истакна неодамна, дозволете ми и јас да ја нагласам, е дека не се работи за бројот на места за коалицискиот партнер, туку за капацитетот на индивидуите – нивното знаење и искуство и како тие ќе придонесат за институциите кои сакаат да ги водат. Помалку да се фокусираме на квантитет, повеќе на квалитет“, изјави Тимчо Муцунски, министер за надворешни работи и трговија.
По локалните избори, премиерот Христијан Мицкоски најави владини промени. Во сегашниот состав на кабинетот, 15 министри се од ВМРО-ДПМНЕ, 6 од ВРЕДИ и 2 од ЗНАМ. Сè уште не е јасно кои заменици-министри би биле засегнати, но сите учесници во коалицијата потврдуваат дека промените ќе се движат во рамките на постојните спогодби од формирањето на Владата.
Реконструкцијата е одложена по партискиот конгрес на ВМРО-ДПМНЕ на 6 декември, а засега се фокусира само на пополнување на испразнетите позиции, како онаа на Меџити. Мицкоски нагласува дека приоритет е квалитетот на кандидатите, а не зголемувањето на бројот на ресори за ВРЕДИ.