По изјавата на еден од лидерите на ВРЕДИ, Изет Меџити, дека постои можност крилото на Алијанса за албанците на Зијадин Села да влезе во Влада – реагираше лидерот.
Тој вели дека секоја дискусија за вклучување во извршната власт мора да се базира на јасни политички услови. Тој подвлече дека приоритет за Алијанса за Албанците останува имплементацијата на Бадентеровиот принцип во Уставниот суд.
Според него, ова е неопходен чекор за да се гарантира еднаквост и правична застапеност, особено за немнозинските заедници во земјата. Тој додаде дека без исполнување на овој услов, не може да има договор за влез во Владата, пренесува Тетова 1.
Реакцијата доаѓа откако Меџити на брифинг со новинарите минатата недела рече дека од „ВРЕДИ“ очекуваат дека по формализирањето на партијата кон нив ќе се приклучат и други политички субјекти, организации и поединци.
Но, дека тоа не важи за Демократската унија за интеграција (ДУИ).
Од коалицијата оценуваат дека по 9 мај кога е конгресот на Вреди, ќе започне ново политичко преструктурирање во албанскиот политички простор и изразија уверување дека значаен дел од членството и структурите на ДУИ, особено од вториот и третиот ешалон, ќе преминат во Вреди.
Градоначалникот на Чаир и копретседател на Вреди, Меџити, во гостување на ТВ 24, не ја исклучи можноста Алијанса предводена од Села, да ѝ се приклучи на Владата. Тој посочи дека комуникацијата се одвива на повеќе нивоа, а вратата за евентуално приклучување е „подотворена“.
„Постои опција Зијадин Села да ѝ се приклучи на Владата. Вратата му е подотворена, комуницираме на различни нивоа“, изјави тој.