Триесет и седум годишниот Иван Јорданов од денеска официјално го почнува вториот градоначалнички мандат. Тој во наредните четири години ќе менаџира со општина Штип, јавните претпријатија, Дом на млади, потоа основните и средни училишта и детските градинки. Јорданов е првиот градоначалник во историјата на Штип, кој од своите граѓани ја доби довербата за втор мандат.
Претседателот на Општинската изборна комисија (ОИК) – Штип, Виктор Вацев денеска свечено ги додели уверенијата на старо-новиот градоначалник, Јорданов и на 23 советници. Во Советот на Општина Штип мнозинството му припаѓа на коалицијата предводена од ВМРО- ДПМНЕ, која има 16 советници, потоа СДСМ со четири советници, Левица има два и еден советник ЗНАМ.
Градоначалникот на Општина Штип, Јорданов во својот говор истакна дека денес е голем и значаен ден за него, бидејќи какошто рече „голема е честа, но и голема е одговорноста да се управува најмодерната и најубавата Општина во нашата држава“.
-Ова е ден кој ќе биде запеметен, но и се надевам ден кој ќе мотивира многу чинители, вклучени во работењето на Општина Штип, да дадат свој максимум во развојот на нашиот град. Општина Штип е со огромен потенцијал и овој потенцијал ќе се искористи доколку заедно сите чинители вложиме труд, посветеност, работа за да ги реализираме сите проекти. Но и за да го развиеме нашиот град и да го искористиме тој потенцијал, којшто го има нашата Општина, рече Јорданов.
Тој се обрати и до новиот состав на Советот на Општина Штип, кој им порача да бидат конструктивни критичари, но и да бидат одлучни во носењето на одлуки за развој на Штип. Во Советот на Општина Штип, најмладиот советник има 18 години и доаѓа од Левица, а најстариот советник, кој е од редовите на ВМРО-ДПМНЕ има 71 година. Јорданов на традиционалниот прв брифинг со новинарите од Штип најави нови капитални проекти во делот на водоснабдувањето, изградба на Пречистителна станица со отпадни води, со средства од ЕУ, решавање на проблемот со сообраќајниот хаос во центарот, потоа со палењето на градската депонија „Трештена скала“ од страна на собирачите на старо железо, изградба на нови булевари и населби.