Претседателката Гордана Сиљановска-Давкова денеска упати срдечна честитка по повод 22 Ноември – Денот на албанската азбука, истакнувајќи го значењето на овој празник како симбол на просветителскиот подвиг и културната зрелост на албанскиот народ.
„Пред 117 години унифицираната азбука го започна своето патување од Конгресот во Битола, како најважен комуникациски код на еден народ. Јазикот и писмото се темелни вредности кои го обликуваат колективниот идентитет и ја зајакнуваат духовната поврзаност меѓу генерациите. Почитта кон јазикот и писмото на секоја заедница ја зајакнува социјалната кохезија и го сплотува македонското мултиетничко општество. Албанскиот јазик е дел од раскошниот мозаик на различностите што е влог во иднината на нашата заедничка татковина“, порача претседателката.
Таа изрази признание за континуираниот придонес на албанската заедница во образованието, културата и општествениот живот и додаде:
„Честит нека ни е Денот на албанската азбука. Продолжуваме заеднички да ја градиме државата во духот на почит, еднаквост и единство. Urime Dita e Alfabetit të Gjuhës Shqipe!“