До Собранието сеуште не е пристигнат предлог за нов гувернер рече денеска собранискиот спикер Африм Гаши на брифингот со новинарите. Но, како што појасни станува збор за одлука која може веднаш да се изгласа, па оттука доколку пристигне на почетокот на идната недела точката ќе може веднаш да биде ставена на дневен ред, со што би се запазиле роковите.
Претседателката Гордана Силјановска-Давкова се уште не пресекла за нејзиниот избор за нов гувернер на Народната Банка. Првиот човек на Собранието Африм Гаши потврди дека таков предлог се уште не пристигнал во законодавниот дом, пренесе Алфа. Со оглед на тоа дека останува уште една седмица до истекот на мандатот на актуелната гувернерка Ангеловска Бежоска, тој рече дека веднаш штом ќе биде доставен предлогот од претседателката, тој ќе биде ставен на гласање пред пратениците. Ангеловска Бежоска ќе ја извршува функцијата се до изборот на нов гувернер иако нејзиниот мандат официјално треба да заврши на 22-ри мај.
- Закон за Народна банка, член 55
- „Мандатот на член на Советот кој е избран во периодот пред истекот на мандатот на постоечки член на Советот започнува по истекот на мандатот на постоечкиот член на Советот.
- Член на Советот на кој му истекол мандатот, до именување на нов член, ги има истите овластувања и ги извршува истите задачи утврдени со закон“.
Кадровското решение за гувернер на Народната банка е еден од најважните избори за економската иднина на Македонија. 7 години додека му трае мандатот, гувернерот има надлежности во одржување на курсот на денарот, нивото на девизни резерви, стабилизирање на инфлацијата, контролирање на портфолиото на деловните банки. Ова е особено важно во моменталното нестабилно глобално окружување, во период на континуирана инфлација и раст на трошоците за живот. Токму во ваков период работеше се уште актуелната гувернерка Анита Ангеловска Бежоска која има право на реизбор. Меѓународните финансиски институции ја пофалија како маневрирала со монетарната политика кога инфлацијата достигна двоцифрена бројка.
- „Инфлацијата беше сведена на ниско едноцифрено ниво, девизните резерви беа зголемени за околу 40% во однос на претпандемиското ниво, а стабилноста на банкарскиот систем зајакната со постигната највисока адекватноста на капиталот во изминативе две децении“ – велат од Народната банка.
Меѓу најсериозните кандидати за прв човек на Народната банка во јавноста се спомнуваат поранешните министри за финансии Зоран Ставрески и Трајко Славески, како и поранешната Вицегувернерка на Народната Банка, Маја Кадиевска Војновиќ, но и актуелната гувернерка Ангеловска Бежоска.