Реален раст на БДП од 3,1 отсто во 2025 година и од 3 отсто во 2026 и 2027 година се процените на Светската банка за земјава. Според последниот извештај, разликата во процентни поени од проекциите во пролетниот извештај за 2025 година е во нагорна линија и изнесува 0,4, 0,3 и 0,2 за овие три години.
Процените и прогнозите ги отсликуваат податоците достапни до 20 септември 2025 година.
Според Светската банка, економскиот раст во Западен Балкан се очекува умерено да забрза во 2026 година и да закрепне до 2027 година, поддржан од зголемувањето на инвестициите и постепеното закрепнување на извозот. Според најновиот извештај, за да се одржи напредокот кон приближувањето до Европската Унија, регионот мора да се фокусира на отворање квалитетни работни места.
Светска банкаЕкономскиот раст во Западен Балкан во 2025 година забави бидејќи инфлацијата предизвика намалување на потрошувачката, а зголемената несигурност ги ограничи трговијата и инвестициите и покрај постојаниот раст на платите и на кредитите. Фискалната политика, иако донекаде олабавена, и понатаму е дисциплинирана со дефицит под 3 отсто и јавен долг во надолна траекторија. Редовниот економски извештај за Западен Балкан проектира дека просечниот регионален раст во 2025 година ќе достигне 3,0 отсто, што е за 0,2 проценти поени помалку од пролетната проекција. Растот се предвидува да се зголеми на 3,1 отсто во 2026 година и на 3,6 отсто во 2027 година.
Како што вели Шаокинг Ју, директор на дивизијата за Западен Балкан во Светската банка, Западен Балкан напредува во намалувањето на развојниот јаз во однос на напредните економии на Европската Унија, но растот сепак не е доволен за да се затвори овој јаз.
„За да му се помогне на регионот, важно е да се преформулираат стратегиите за работни места: охрабрување на поголемо учество на пазарот на трудот, подобрување на вештините на населението и раст на фирмите преку дигитални надградби“, истакнува Ју.