Како држава, сè уште нема точна евиденција за вкупниот број на службени возила, ниту пак е познато колку од нив се целосно нефункционални и неупотребливи. Ова го откри на 4ТВ директорот на Службата за општи и заеднички работи,, Ивица Томовски.
Томовски нагласи дека со години институциите немале систематски преглед на државниот возен парк, поради што дел од службените автомобили биле оставени да скапуваат без никаква намена или корист.
Тој информираше дека институцијата што ја раководи веќе започнала процес на чистење на нефункционалните возила, при што се „ликвидирани“ повеќе од 100 автомобили што со години биле паркирани на сервисни места.
„Точно 104 возила во нашата институција што едноставно „стоеја“ на паркингот се поништени. Направивме проценка, објавивме јавен тендер и ги продадовме сите.
Станува збор за возила со нулта вредност, односно уништени автомобили, поради што самиот тендер беше наречен: „продажба за старо железо““, забележа Томовски.
Според него, оваа постапка не само што ослободила простор во рамките на службата, туку и затворила еден ран проблем поврзан со неправилното управување со државниот имот.
Томовски оцени дека ваквите примери покажуваат колку се неопходни целосни податоци и контрола врз службените возила, со цел да се спречат идни злоупотреби, дополнителни трошоци и занемарување на државниот имот.