Управата за јавни приходи ја започна третата фаза од проектот е-Фактура, со која на деловните субјекти им се овозможува тестирање на системот преку нова веб-апликација за електронска размена на фактури. Од УЈП информираат дека новата фаза има за цел да обезбеди практична тест-околина во која компаниите ќе можат да креираат, испраќаат, прифаќаат, одбиваат и сторнираат електронски фактури, без разлика на нивната големина или техничка подготвеност.
Проектот досега помина низ две фази. Во првата беше тестирана интеграцијата на деловните софтверски системи со платформата е-Фактура, додека во втората беа додадени нови функционалности и даночни индикатори, што бараше дополнително прилагодување на системите на компаниите. Со стартот на третата фаза, УЈП воспостави соработка со околу 200 компании кои ќе учествуваат во структуирано тестирање на платформата во координација со даночни агенти од институцијата.
Од Управата посочуваат дека досега се реализирани околу 30 информативно-едукативни средби со компании, стопански комори и бизнис здруженија, а во наредниот период ќе следуваат нови обуки, вебинари и детални упатства за користење на системот.
УЈП ги повика сите компании активно да ја користат тест-платформата и да доставуваат предлози, забелешки и препораки за понатамошно подобрување на функционалностите на системот. Од институцијата нагласуваат дека и компаниите кои немаат назначено даночен агент можат да пристапат кон тестирање на системот и навремено да пријават евентуални технички потешкотии или забелешки.