Македонија

Уставниот суд ги отфрли иницијативите, со кои се оспоруваше уставноста на „Безбедниот град“

Уставниот суд ги отфрли иницијативите да се оспори системот „Безбеден град“, односно дел од одредбите на Законот за прекршоци. Иницијативи со кои се бараше да се оспори „Безбеден град“ поднесоа двата дела на Алијансата за Албанците, предводени од Зијадин Села и од Арбен Таравари, како и студентот Или Пачуку, поради неупотребата на албанскиот јазик во пораките за прекршоци. Забелешката е и за, како што се тврдеше, „спроведувањето на системот само во Скопје, Тетово и во Куманово“, потоа и за обврската за поседување мобилен телефон и интернет-адреса заради доставување на пораките, но и за наводна „селективна примена на Законот и за дискриминација на Албанците“. Со иницијативите се бараше Уставниот суд да ги поништи „спорните“ одредби.

Известителката на предметот судијката Ана Павловска-Данева рече дека Судот има богата уставно судска практика во која не е поведена постапка и ја отфрлила иницијативата, а како примери наведе дека се оспорувала обврската за поставување камера и за Законот за основно образование, каде што се барало оспорување на закон поради нееднаков пристап на учениците до интернетот и до компјутерите за време на ковид-пандемијата. Таа рече дека тие иницијативи биле отфрлени, бидејќи се навлегло во сферата на примена на закон, за што Уставниот суд не одлучува.

– За барањето да се оцени примената на законот има богата практика – од 2009, 2010 и 2013 година. Уставниот суд носи решенија со кој се прогласува за ненадлежен кога станува збор за примена на некои законски одредби. Уставниот суд во континуитет има одлуки дека не ја оценува примената на законот – рече Павловска-Данева.

Според судијката известител, кога станува збор за (не)употребата на албанскиот јазик во пораките и известувањата што ги добиваат граѓаните за сторени прекршоци, нема потреба за секое процесно дејствие поединечно да пишува дека треба да се применува Законот за јазиците. Таа вели дека во Законот за прекршоци нема одредба што ја оспорува употребата на јазиците. И поседувањето мобилен телефон не се коси со која било одредба од Уставот. За тоа дека со Законот може да се злоупотребат личните податоци, таа наведе дека постои Закон за заштита на лични податоци и дека и МВР и Агенцијата за заштита на личните податоци ги дале сите согласности за заштита на приватноста на граѓаните.

– МВР изменило три-четири закони за да се приспособат на заштитата на личните податоци. Скратен е и рокот за зачувување снимени материјали од шест на еден месец. Донесени се и правилници. За територијалната примена на закон, во Законот за прекршоци нема одредба дека тој важи за една, две или три општини, туку дека ќе важи за целата територија. Примената на законот е примена и за тоа одлучува извршната власт. Не знам што би укинале кога таква одредба во законот нема, тој важи за целата територија. Од сите аргументи предлагам отфрлање на наша надлежност за иницијативите, бидејќи нема причина за поведување постапка или, пак, одлуката да биде дека сме ненадлежни за примена на законот. Никаде не наоѓаме основа за поведување постапка – рече Павловска-Данева.

Ајдари и Кадриу гледаат правни празнини во делот на јазикот
Судијата Насер Ајдари, наспроти известителката за предметот, смета дека во делот на јазикот има правна празнина, бидејќи не е наведено на кој јазик ќе бидат известувањата. Тој смета дека граѓаните се во нееднаква положба во зависност од географската локација, бидејќи Законот се применува во три града, односно дека ист прекршок се открива и санкционира на различен начин. Тој смета дека граѓанинот не е должен да користи мобилен и дека се создава правна ситуација во која граѓанинот може да трпи правни последици, а за тоа да не е информиран. Ајдари се изјасни дека не го поддржува рефератот на Павловска-Данева.
Според судијата Осман Кадриу, законодавната власт потфрлила, бидејќи со Законот за употреба на јазиците е предвидено употребата на албанскиот јазик да се регулира во законите, што не е сторено.

– Го ценам освртот што го дава МВР. Тие направиле обид да одговорат на клучните прашања на иницијативите, но точно е дека за употребата на албанскиот јазик тие се повикуваат на одредба која е во основните одредби од законот – дека ќе се употребат одредби наведен од Законот за јазиците. За мене ова не е прецизно. Собранието не постапува по обврската на Уставот – со закон да ги уреди прашањето за јазикот и во постапките пред правосудните органи. Собранието абер нема да донесе вакви закони за со јасни и конкретни одредби да го уреди прашањето на примената на албанскиот јазик во државата – вели Кадриу.

Тој смета и дека постои ризик за злоупотреба на личните податоци и потсети дека токму МВР ги злоупотребило податоците во случајот со масовното прислушување. И Кадриу рече дека нема да гласа за извештајот на Павловска-Данева.

Судијката Добрила Кацарска го поддржа рефератот, но предложи Собранието да го доуреди Законот во членот 48г став 1, односно ако прекршокот е констатиран електронски, а сопственикот не го управувал возилото, а знае кој го управувал, да не мора лично да дојде со лицето што управувало со возилото за да даде податоци, туку тоа да може да го стори електронски или по телефон.
– Овој член го оспорувам, бидејќи ако сопственикот е во странство, тој за да дојде и лично да даде изјава, ќе треба да се изложи на непотребни трошоци. Сега комуникацијата меѓу МВР и сторителот се одвива по мобилен, а за ова се бара лично присуство. Зошто таа комуникација не е иста, може возилото е украдено, од каде сопственикот ќе знае кој го украл за да бара лична изјава од него. Оваа одредба е спротивна на Уставот и за оваа одредба да се побара Собранието да ја доуреди – рече Кацарска.
За судијата Фатмир Скендер, апсурд е пораките освен на македонски да бидат и на англиски јазик, бидејќи, како што рече, „нема логика да ги почитуваме странците, а не нашите граѓани“.

Претседателот на Уставниот суд Дарко Костадиновски рече дека мерките што се преземени со системот „Безбеден град“ се пропорционални на целта и дека ќе го прифати рефератот.

– Со сила на аргументи предлагам одлуката да биде неповедување постапка, а не отфрлање. Може за територијална примена на решенијата да се предложи отфрлање, за сè друго, толку се силни аргументите што штета е да одиме со отфрлувачка одлука – рече Костадиновски.

Тој рече дека не се согласува дека со Законот се ускратува правото на употреба на албанскиот јазик.

– Проектот „Безбеден град“ е проектиран да препознае возило, регистрација, не јазик. Сметам дека пораката треба да биде на македонски, бидејќи тој е службен јазик и дека тоа е право и должност за сите граѓани. Добро е пораките да бидат на македонски и на англиски јазик оти и странец може да направи прекршок. Прашањето на јазикот мислам дека сосема исправно е уредено во Законот за прекршоци, каде тој упатува на примена на јазикот, но во постапката. Текстуалната порака е доволно да биде на македонски и на англиски. Тој систем не регистрира човек, туку возило. Тој потоа во сите фази од постапката ќе го користи албанскиот јазик. За поседување мобилен не постои обврска, но нема ни обврска за поседување возило. Сепак, реалноста е дигитализацијата. Нема ни законска должност да поседуваш оружје, но ако сакаш, законот пропишува кој може да поседува. Ние сме европски рекордер по сообраќајки, што значи возилото кај нас е оружје, тогаш ќе треба да поседува и телефон. Ако не, нека оди со коњ. Таква ни е реалноста – рече Костадиновски и додаде дека ќе прифати и отфрлање на иницијативите ако нема мнозинство за неповедување постапка.

Најнови вести од: Македонија

Велјановски до опозицијата: Не може да се заборави како ја пљачкавте државата

На денешната собраниска седница на Комисијата за финансирање и буџет каде се дискутираше Предлог-Буџетот за 2027 година, пратеникот од ВМРО-ДПМНЕ, Александар Велјановски, кажа дека и покрај долговите наследени од претходната влада, предводена од СДС, кои се тежок товар за државата, оваа Влада предводена од ВМРО-ДПМНЕ ќе продолжи со силни инвестиции, со работа на фискална консолидација, но и со зајакнување на здравствената и социјалната заштита на граѓаните.

Ристески: Клучен приоритет на Владата е да ги задржи младите во Македонија

Законот за сезонски работници што е во сила од 1 јануари 2026 година, сѐ уште не ги дава очекуваните резултати, но ова не е закон направен за една година. Затоа организираме информативни средби и настани со помош на медиумите, стопанските комори, работодавачите и синдикатите – за да ги анимираме луѓето дека пензионери, студенти, оние кои сакаат дополнително да работат и сите категории невработени лица можат да го искористат, без притоа да го изгубат стекнатиот статус, да имаат комплетно пензиско и здравствено осигурување, фер ангажман, платен работен час колку што се ангажирани дополнително и со тоа да остварат дополнителни приходи – рече денеска заменик-министерот за економија и труд, Марјан Ристески.

Општина Охрид ги засилува активностите за затворање на депонијата „Буково“ и воспоставување нов систем за комуналниот отпад

Завршена е постапката за избор на проектант за изработка на техничката документација за затворање на нестандардната депонија „Буково“, а во тек се и активностите за изградба на претоварна станица кај Мауцкер и собирен центар во Охрид. Претоварните станици и Регионалниот центар за управување со отпад во Новаци се очекува да бидат функционални во 2030 година. Ова беше истакнато на денешната средба во Општина Охрид, посветена на новиот Регионален план за управување со отпад и воспоставувањето интегриран систем за Југозападниот и Пелагонискиот плански регион.

Зафировски за признанието на Михаилова за ДАНС: Ова е бугарска пародија, во која самата се излаја за поврзаноста со тајните служби

Срамота и давање автогол, бугарска пародија во која Ива Михаилова самата недоветно се излаја за улогата на тајните служби и бугарската ДАНС во целиот нејзин „случај“, посочи безбедносниот аналитичар Воислав Зафировски во „За македонските работи“ со Љупчо Цветановски. Недораснато дете кое избрза и искрено си кажа се што треба и не треба, класичен автогол во полза на Македонија за случај кој беше поддржан и од највисоките бугарски функционери.

Муцунски: Проширувањето на ЕУ е геополитичко обединување на Европа и стратешка инвестиција во постабилен и побезбеден континент

Министерот за надворешни работи и надворешна трговија Тимчо Муцунски синоќа во Скопје се обратил на конференцијата „Безбедноста во Западен Балкан“, организирана од германскиот институт „Аспен“ (Aspen Institute Germany) во соработка со Министерството за надворешни работи и надворешна трговија.

„КАЖИ НЕ!“ – кампања на МВР против сексуалната злоупотреба на деца во дигиталниот простор (ВИДЕО)

Целта на кампањата е да се подигне свеста кај децата, младите, родителите и пошироката јавност за препознавање и спречување на сексуалната злоупотреба во дигиталниот простор

Најнови вести

To top