Гледање во мобилен телефон, носење слушалки во двете уши, или користење на било каков друг електронски уред додека се поминува пешачки премин или пак се вози тротинет, велосипед или мопед по коловозот, од денеска ќе се казнува со 40 евра за пешаците и 50 евра за возачите на овој тип превозни средства.
Од сега стапија во сила измените и дополнувањата на Законот за безбедност на сообраќајот на патиштата, преку кои сообраќајните полицајци ќе можат да казнуваат учесници со намалено внимание во сообраќајот.
Забранета е употребата на сите електронски уреди што ги расејуваат пешаците.
- „Законските решенија се воведуваат со цел елиминирање на некои навики кај пешаците и возачите на одредени категории возила. Меѓу нив, пешак е должен кога се движи по коловоз под условите утврдени со овој закон, или кога ја преминува улицата и велосипедската патека или велосипедската лента, да се движи и да помине внимателно без да користи електронски уреди, како што се слушалки, мобилен телефон, таблет, паметен часовник или друг електронски уред, кој ја намалува внимателноста, додека ја преминува улицата и велосипедската патека или велосипедската лента“, вели портпаролот на МВР.
Од Министерството за внатрешни работи апелираат да се почитуваат правилата во сообраќајот бидејќи ќе има засилени акции со нулта толеранција за прекршоци кои можат да предизвикаат и фатални несреќи.