Маја Блажева, сопругата на популарниот македонски музичар Владимир Блажев Панчо, кој почина вчера по долга борба со повредите од пожарот во кочанската дискотека „Пулс“, трогателно им се заблагодари на лекарите и персоналот од приватната болница Систина, кои цели седум месеци се бореа за неговиот живот.
„Вие бевте тие кои ми дадовте седум месеци можност да се гушкам и зборам сѐ што не си кажавме цел живот. Ви благодарам за секоја секунда посветена од сите вас како болница која ми станавте и втор дом изминатиов период. Нема зборови и нема утеха, а знам дека сте и вие скршени од болка“, напиша Маја Блажева на социјалната мрежа Фејсбук.
Таа претходно трогателно се прости и од својот сакан Панчо, со кого беа во брак од 2013 година, и со кого има два синови Андреја и Марјан.
„Не се договоривме вака, душо моја, љубов моја, живот мој. Ме скрши на милион делови“, напиша Маја.
Од лидерот на групата „ДНК“ со објава на Фејсбук се прости и болницата Систина, каде тој се лекуваше.
„Почивај во мир, драг наш Панчо. Се боревме заедно 213 денови и денес ни одлета… Нема зборови за утеха за твоите два ангела Марјан и Андреја и за твојата Маја… Нема зборови што можат да ги запрат солзите на нашите доктори, сестри, болничари кои беа 24 часа со тебе … Целата болница, заедно со тебе и твоето семејство се боревме и верувавме“, напишаа од болницата.
Панчо е уште една жртва во кочанската трагедија. Од групата „ДНК“ која заедно со Андреј ја предводеа, преживеани се само два члена, придружната вокалистка Ана Костадиновска и младиот гитарист Горан Тонев.
Јавното обвинителство потврди дека ќе издаде наредба за обдукција на телото на Блажев.