Во вчерашното силно невреме во Скопје вкупно 33 лица, од кои неколкумина со потешки повреди, биле примени во болничките установи, соопшти Министерството за здравство.
Во Клиничката болница „Св. Наум Охридски“ помош побарале 22 повредени, од кои двајца се задржани на болничко лекување. Во Клиничкиот центар „Мајка Тереза“, на Клиниката за трауматологија, ортопедски болести, анестезија, реанимација, интензивно лекување и ургентен центар (ТОАРИЛУЦ) примени се 11 лица, од кои тројца со скршеници.
Сите повредени се во стабилна состојба, уверуваат здравствените власти.
Од невремето е оштетена и старата конструкција на покривот на болницата „8 Септември“ во Скопје, но тоа не предизвикало прекин во работата на установата. Значителна штета е причинета и на покривот на Клиничката болница во Штип, каде се погодени Одделот за ортопедија и ортопедската сала. Поради тоа, дел од пациентите беа привремено преместени на други одделенија.
До санирањето на штетата, пациентите со скршеници од Источниот регион привремено се упатуваат кон други здравствени центри за да добијат соодветен третман без одлагање.
Во дворовите на повеќето болници има паднати дрвја, а осигурителните компании веќе ја прават проценката на штетата, по што веднаш ќе се пристапи кон обнова на кровните конструкции за да се обезбеди непречено функционирање на болниците, соопштија од Министерството за здравство.