ВМРО-ДПМНЕ преку соопштение најостро ги осуди „ниските и подмолни“ навреди на Фатмир Битиќи кон министерката за финансии, Гордана Димитриеска-Кочоска.
„Нападите и омаловажувањата искажани од Фатмир Битиќи се одраз на слаб и исплашен човек. Само човек кој е несигурен во себе прибегнува кон ниски напади врз жена, сопруга и мајка“, се наведува во реакцијата на партијата.
Од ВМРО-ДПМНЕ посочуваат дека Битиќи, наместо по професионалност и работа, е познат единствено по својата етничка припадност во СДСМ, врз која ја гради политичката кариера.
„Човек без кредибилитет и без доволно домашна култура навредува друг човек во отсуство на аргументи за расправа“, се вели во соопштението.
Навредите следуваат по расправата за предлог-ребалансот на Буџетот, кога Битиќи иронично ја нарекол министерката Димитриеска-Кочоска „сметководителка“.
Од ВМРО-ДПМНЕ додаваат дека Битиќи ќе остане запаметен како дел од „неспособниот и криминален мозаик“ на тандемот ДУИ–СДСМ и дека и во неговата партија, како и кај Албанците и Македонците, постои срам поради неговото однесување.
Партијата ја повикува јавноста да го осуди ваквиот вид на политичка комуникација која, според нив, ја деградира политичката култура во земјата.