Денес во Битола, во рамки на одбележувањето на 83 години од депортацијата на македонските Евреи, Фондот на холокаустот на Евреите од Македонија потпиша Договор за донација со ЈУ Дом за доенчиња и мали деца – Битола.
Донацијата е водена од идејата „Од живите – за живите“, а во спомен на децата кои Битола ги загуби, но со мисла за децата кои се тука денес.
„Минатото не можеме да го промениме, но имаме должност да ја градиме иднината со грижа, солидарност и човечност.“ – изјави Иван Николиќ | Ivan Nikolic, Претседател на Управниот одбор на ФХЕМ, на денешната посета на Домот.
Претходно, во Битола беше одбележана 83-годишнината од Холокаустот на македонските Евреи, со комеморативна програма посветена на сеќавањето и почитта кон жртвите.
Претставници на Фондот на холокаустот на Евреите од Македонија (ФХЕМ) и Еврејската заедница во Република Македонија (ЕЗРМ), заедно со претставници на дипломатскиот кор, институциите и бројни гости, оддадоа почит на жртвите преку комеморативна програма и полагање цвеќе пред спомениците во градот.
На одбележувањето присуствуваа градоначалникот на Битола Тони Коњановски, заменик-министерот за финансии Николче Јанкуловски, потпретседателката на Собранието Весна Бендевска, заменик-министерката во Министерството за европски прашања Викторија Трајков, како и пратеничките Олга Лозановска и Бисера Костадиновска Стојчевска, соопштија од таму.