Проектот, чија вредност е проценета на речиси 6,7 милијарди денари, предвидува завршување на главниот болнички објект, набавка на современа медицинска опрема и целосно функционално поврзување на сите болнички одделенија, со цел Источниот регион да добие современ клинички центар.
– Завршувањето на Клиничката болница во Штип е долг кон граѓаните на источна Македонија. Целта е пациентите да добиваат навремена и квалитетна здравствена заштита, а здравствените работници и студентите да имаат современи услови за работа и професионален развој – изјави Клековски.
На средбата со делегацијата на Светската банка биле разгледани техничките и финансиските анализи, моделот на финансирање, проектната документација и механизмите за контрола на квалитетот, трошоците и роковите.
Според министерот, ревизијата на постојната состојба треба да заврши во наредните два месеца, по што ќе биде распишан меѓународен тендер за избор на изведувач. Постапката за избор и потпишување договор се очекува да трае уште околу три месеци.
– Ќе работиме со компании со меѓународна репутација и капацитет за да се избегнат проблемите што ги имаше во минатото при реализацијата на проектот – рече Клековски.
Тој информираше дека досега се реализирани околу 30 проценти од планираните финансиски средства. Болничкиот објект е во фаза на затворена карабина, со завршен најголем дел од фасадата и инсталациите, а останува да се изведат најсложените и најскапи сегменти – оперативниот блок, машинските системи и инсталирањето на медицинската опрема.
Во втората фаза од проектот е предвидено уривање на старите објекти, изградба на нови содржини и нивно поврзување во единствен функционален болнички комплекс.
Клиничката болница во Штип е единствениот регионален клинички центар во источниот дел на земјата и обезбедува здравствени услуги за околу 150.000 жители, додека поширокото гравитациско подрачје опфаќа околу 250.000 граѓани.
Од Министерството за здравство очекуваат дека со завршувањето на проектот ќе се подобрат дијагностиката, лекувањето и итната медицинска помош, ќе се намали притисокот врз здравствените установи во Скопје и ќе се создадат подобри услови за задржување на медицинскиот кадар во источниот регион.