Делегација на Демократската унија за интеграција (ДУИ), предводена од претседателот Али Ахмети, вчера имала средба со конгресменот Кит Селф, претседател на Поткомитетот за Европа во Конгресот на Соединетите Американски Држави. „На средбата се разговарало за политичките случувања во С.Македонија, значењето да се зачува Охридскиот мировен договор, како и за сериозната загриженост околу неговата ерозија во државните институции.“ – со овие тврдења се огласи ДУИ во своето соопштение за споменатата средба.
.
„Соговорниците истакнаа дека Охридскиот договор останува темел на мирот, соживотот и мултиетничката демократија во земјата, но и една од најзначајните стратешки инвестиции на Соединетите Американски Држави во регионот. Претседателот Ахмети изрази благодарност за улогата и континуираната посветеност на САД во поддршката на стабилноста, безбедноста и евро-атлантската ориентација на С.Македонија и Западен Балкан“, соопшти ДУИ.
Посетата на Конгресот на ДУИ уследува неколку дена откако Стејт Департментот на САД соопшти дека САД ја менува својата доктрина за Балканот. „Соединетите држави ја напуштаат политиката на градење држави и интервенционизам во Западен Балкан и се свртуваат кон соработка, со посебен акцент на Босна и Херцеговина и реализацијата на Јужната гасна интерконекција со Хрватска“, се наведува во извештајот на американската администрација до Конгресот за односот со Западен Балкан.
„Заврши ерата на американската политика на градење држави“, се наведува во извештајот на Стејт департментот до Конгресот на САД, објавија во неделата хрватски медиуми. Со тоа се потврдува свртувањето на американската администрација кон овој дел од светот, наведувајќи дека нивната политика повеќе не е фокусирана на „спасување или реконструкција“, туку на стабилност и заемно полезно партнерство.