Потврдата од украинскиот претседател Володимир Зеленски за време на посетата на Белград дека неговата земја не го менува ставот за непризнавање на Косово ѝ го крена притисокот на косовската јавност, а првата конкретна реакција е отстранувањето на знамето на Украина од фасадата на зграда во центарот на Приштина.
„Државата Косово мора да се почитува Кога Косово не се почитува, главниот град Приштина одговара!
Нашата емпатија и солидарност секогаш ќе бидат со народите кои се соочуваат со војна, насилство и прогон. Бидејќи ние, подобро од многу други, знаеме што значи да се бориш за слобода, достоинство и право на постоење како држава.
Но, ниедна кауза и ниедна политика не може да се гради со омаловажување на државноста на Косово и жртвата на неговиот народ“, објави на Фејсбук приштинскиот градоначалник Перпарим Рама заедно со видео од симнувањето на огромното украинско знаме.
Косово застана на украинска страна од самиот почеток на руските напади врз Украина, изразувајќи солидарност и поддршка за Киев и критики за Москва, но изјавата на Зеленски среде Белград го смени односот на Приштина.