Преполниот стадион „Пољуд“ му упати последен поздрав – преку песна – на Мате Мишо Ковач, легендата на хрватската музика и најтиражниот естраден уметник во поранешна Југославија со над 20 милиони продадени плочи, касети и компакт-дискови.
Пријатели, колеги и 34.000 обожаватели се обединија на трибините на сплитската убавица, пеејќи ги неговите безвременски хитови на стадионот што заземаше посебно место во неговото срце.
По ова емотивно испраќање, Мишо тргна на своето последно патување долж далматинскиот брег – од Сплит, преку неговиот роден град Шибеник, па сè до Задар – придружуван од мноштво обожаватели и поддржувачи.
Најемотивниот момент се случи кога возилото со ковчегот направи круг околу фудбалскиот терен, а потоа се упати по крајбрежниот пат – минувајќи низ неговиот роден град Шибеник и градот Задар – на пат кон Загреб. Во Шибеник, жителите се простија од својот „Мишо“ со песни на плоштадот пред катедралата „Свети Јаков“.
Погребот на Мате Мишо Ковач ќе се одржи утре на загрепските гробишта „Мирогој“, во присуство само на неговото семејство, додека комеморација во негова чест ќе се одржи во среда, 11 ноември, во 12:00 часот, во концертната сала „Ватрослав Лисински“.
Видео од испраќањето на „Пољуд“ на едно од најголемите музички имиња во регионот на линкот.