Премиерот на Албанија, Еди Рама, на четвртиот Самит на дијаспората упати порака дека иднината на државата не се гради исклучиво во Тирана, туку и во сите средини каде што живеат Албанци, потенцирајќи ја нивната улога на глобално и регионално ниво.
Во своето обраќање, тој ја истакна важноста на дијаспората за економскиот развој и европската перспектива на земјата, наведувајќи дека градови како Рим, Атина, Лондон, Цирих, Њујорк и Берлин се меѓу центрите каде што, како што рече, се обликува иднината.
Рама посвети внимание и на положбата на Албанците во регионот, при што Косово го опиша како „друга независна држава на Албанците“, додека Албанците во Северна Македонија ги нарече „државотворен народ на соседната и пријателска Република“.
„Иднината на Албанија се пишува секаде каде што Албанците живеат, работат и сонуваат. Но се пишува и надвор од границите – од Косово, преку Северна Македонија, до Црна Гора“, изјави Рама.
Тој додаде дека оваа реалност не треба да се занемари, туку да се прифати како основа за соживот и стабилен развој во регионот.
Во продолжение, премиерот повика на премин „од дистанца кон блискост и од чувства кон стратегија“, нагласувајќи дека преку заеднички пристап Албанците, без оглед на нивната географска распределеност, можат да имаат поголемо влијание врз економските и политичките текови.
Пораката од самитот, како што истакна Рама, е дека дијаспората и Албанците во регионот не претставуваат периферија, туку активен фактор во обликувањето на иднината.