Србија би можела да стане првата земја по Русија каде пациентите ќе добијат персонализирана МРНК вакцина против онколошки заболувања, изјави за РТС Ненад Поповиќ, министер без ресор во Владата на Србија задолжен за меѓународна економска соработка.
Вакцината, развиена во Русија, успешно ги поминала сите фази на тестирање врз животни, постигнувајќи, според Поповиќ, 100% успех. Се очекува руското Министерство за здравство наскоро да одобри нејзина употреба кај пациенти.
Минатата недела, Србија ја посети висока руска делегација предводена од академикот Александар Гинцбург, директор на Институтот „Гамалеја“, и Андреј Каприн, главен онколог на Русија и директор на онколошкиот центар „Герцен“. Во делегацијата беа и претставници на руското Министерство за здравство и Рускиот фонд за директни инвестиции, а на крајот од посетата тие беа примени од претседателот на Србија, Александар Вучиќ.
„Разговаравме за сите аспекти на идната соработка, вклучително и можноста Србија да се вклучи во примената на оваа револуционерна вакцина“, рече министерот Поповиќ.
Вакцината е наменета за третман на меланом и одредени видови рак на белите дробови, со планови за развој на варијанти за други форми на рак. Таа претставува персонализирана терапија, создадена индивидуално за секој пациент врз основа на неговиот генетски профил.
„Генетскиот материјал на пациентот се зема и се комбинира со ткивото во кое се развил туморот. Со помош на најновите математички модели и вештачка интелигенција, вакцина наменета за тој конкретен пациент се добива во рок од само седум дена“, објасни Поповиќ.
Според академиците Гинзбург и Каприн, вакцината покажала извонредни резултати дури и кај пациенти во напредни фази на болеста, вклучително и со метастази.
„Претходно, таквите процеси траеја шест месеци, а сега, благодарение на новите технологии, од дијагноза до примање на вакцината поминуваат само неколку недели“, додаде Поповиќ.
Според договор меѓу претседателите Владимир Путин и Александар Вучиќ, Србија ќе биде меѓу првите земји што ќе ја применат оваа терапија.
„Планирано е нашите пациенти да можат да ја примат оваа вакцина следната година, веднаш по руските пациенти“, рече Поповиќ.
Формирана е работна група за подготовка на инфраструктурата и обука на медицинскиот персонал, а до крајот на годината српски експерти од областа на медицината, микробиологијата и Институтот „Торлак“ ќе престојуваат во Москва за да се запознаат со процесот – од земање генетски профил до производство на вакцината.
„Сакаме поголемиот дел од дијагностиката да се прави во Србија, а самата вакцина да пристигне од Русија со ладен транспорт, како што беше случајот за време на пандемијата на Ковид“, рече Поповиќ, додавајќи дека до крајот на 2026 година вакцината би можела да се произведува и во Србија, во Институтот „Торлак“.