Англија рано утрово го совлада кодомаќинот Мексико со 3:2 на легендарниот стадион „Астека“ и се пласира во четвртфиналето на Светското првенство.
Џуд Белингам ги замолкна десетките илјади мексикански навивачи постигнувајќи два гола во интервал од само 98 секунди (36. и 38. минута). Првиот гол беше со глава, а вториот по асистенција на Хари Кејн.
Мексико се врати во игра со голот на Хулиан Кињонес пред крајот на првото полувреме. Во 54. минута Англија остана со играч помалку откако Џарел Куанса беше исклучен по интервенција на ВАР. Сепак, Англија доби пенал, Кејн беше прецизен и донесе предност од 3:1.
Со шестиот гол на турнирот, Кејн се израмни со легендата Герд Милер на петтото место на вечната листа на стрелци на Светски првенства (14 гола). Раул Хименес намали на 3:2, но Англија успеа да го одбрани водството до крајот, и покрај силниот притисок на Мексико.
Четвртфинале против Норвешка
Англија во четвртфиналето ќе се сретне со Норвешка, која сензационално го елиминира Бразил. Мечот ќе се игра во сабота во Мајами Гарденс.
Мексико по осми пат од 1986 година завршува во осминафиналето. Со елиминацијата на Канада и Мексико, од трите кодомаќини на турнирот во игра остана само САД.