По шест победи во исто толку меѓусебни дуели со Летонија, фудбалската репрезентација на Македонија првпат не славеше против многу послабо рангираниот противник, играјќи без голови во контролниот натпревар во Скопје, воедно и увертира за гостувањето кај Велс на крајот од мундијалските квалификации.
Токму поради тој неспоредливо поважен дуел за избраниците на селекторот Благоја Милевски, во кој влогот е второто место во групата и втор бараж за Светско првенство едноподруго преку квалификациите, „црвено-жолтите“ ги чуваа силите за „фудбалската војна“ што ги очекува во вторник од 20:45 часот во Кардиф.
Елмас, Миовски и Трајковски ги одиграа последните 30 минути, а капитенот Барди само првото полувреме, но и во таква ситуација македонските фудбалери имаа и поголем посед на топката (56:44 отсто), и повеќе удари вкупно (13:9), и повеќе шутеви во рамките на голот (7:3), а гостинската мрежа, сепак, не се затресе.
Погледите сега се вртат кон гостувањето на Велшаните кај аутсајдерот Лихтенштајн в сабота од 18 ч., по кое ќе се знае дали на Македонија ќе ѝ врши работа и реми во меѓусебниот дуел, бидејќи има три бода повеќе и подобра гол-разлика за шест гола, но и еден погодок помалку постигнато.