Најдобриот македонски кошаркар Ненад Димитриевиќ го забележа својот најдобар настап во Евролигата како најкорисен играч во победата на Баерн Минхен од 85:76 над европскиот првак и лидер Фенербахче.
Само за 21:15 минути во игра македонскиот бек оствари перформанс 25 благодарејќи на своите 22 поени, најмногу од актерите на паркетот во Минхен и рекордни за него во најсилното клупско натпреварување на стариот континент.
Популарниот Нено биеше 5/9 за два поена, 2/4 за тројка и 6/7 од линијата за слободни фрлања, а додаде и три асистенции, како и по еден скок и украдена топка.
Со победата во последниот меч на домашен терен во основниот дел од сезоната, Баерн Минхен се искачи на 14. место со скор 15/20 во победи.